قصيدة 5 جويلية

5 جويليه (ثوريه ) 1995       

قـرب يـاجوليت سهـله ومــرحب	*	شهـر النصر وفيـك حريتنا جات
شهـر الخيـر احبيبنا ليـنا قــرَّب	*	بيك أفرحنا فيك شمس الحق ضوات
يامفتاح الخيـر جاب النـصر أقصب	*	نـح الغبـنه عـاد شهر المعجزات
مـن قبلك نـوفمبر جــو امسـحب	*	رعد وبـرق اعلى العدو والصاعقات
تبروري وحـجار حـرشه تتكـركب	*	سبـع اسنيـن ونـص ما فيها هدنات
قـدم شعبـي فيـه مـا نـيشي نكذب	*	مليـون وتبـعو ابنصفو عنـو مات
شبـاب وشيـوخ ضحـو فـلمضرب	*	ومـتحـدث تـاريخ ذاكـرهم بذات
وشاهدات  امن انـسا دور وأحـسب	*	ما تحصـيش أعـدادهم بالـماشينات
مـاتو مـن أجـل ادزاير فيــها حب	*	حب الـوطن اصعيب يـدي للممات
خـاين وطـنو واش قـولو عند الرب	*	مثـل الكـافر يوم قـدوه في ويلات
والشهـيد امكـانتو أعلـى منـصـب	*	مـع لنـبيه لـيه أعلى درجــات
يـا سـامع لبـيات بـايع وتــأهب	*	وحـيي شهـر الخير شهر انتصرات
واتفكر مـا صـار في شعبك وأكتب	*	دوَّن عندك قـصتو تـملي صفحات
واحـكيها لجـيال عندك نوض اتعب	*	كيما تـعبوا لـوليــن انـوقتا فات
واحلف بلـيمين صـادق لا تكــذب	*	هـذا الـقول اصحيـح وريهم شرات
وريهم جـبال كـحله وعـــراقب	*	محـروقه بالنـار ضـرب الطيرات
سولـهم قـداه مـن قـريه خــرب	*	وكم مـن دشـره بـادها بالجرفات
وريهم ويدان ياسـر وشعــايـب	*	مزالت بـالدم حــمره معـلومات
وكـم من واحد مات بنار أمــعذب	*	ومشَّـوه موجود عـن قيـد الحيات
كم من واحد مـــات شبان و شايب	*	نكل بيـهم ذا العـدو شيـن المتات
و كـم مـن واحـد كان منفي متقرب	*	أعلـى وطنـو غـربوه العين بكات
يا سـامع تـاريخ وطنـك ليه أقصب	*	و افخر بيـه و هـز عالي ذاالريات
و حـيي خمسه كل عام اخزر راقـب	*	مـن جـوليت و ديـر حفله ذكريات
ذا خمسه جـوليت ولالـك مكــسب	*	عيـد النصـر و عيد فخر و حريات
رسم احـروفـك واجبو فضه و ذهب	*	بيـهم نكـتب اسـم شهر المعجزات
أنت و نـوفمبر عنــكم نكـــتب	*	و انـقني باشعـار ننظمـها و بيات
يا شعــبي يكـفيك فـرقه علمنصب	*	اتوحد صـف افريد يكفي خصومات
وابنـي و طنـك شيـدو لا تتـلاعب	*	و انظـر حولك شوف عاندها جرات
و انـت لاهـي مـا اتـفكر ما تحسب	*	تتمنـالك فلـهزايم و خســـرات
وطنـك يحـرق و المصـانع تترب	*	و الشباب ايمـوت عنـدك بالمئـات
اللـي ميـت جـزائري ليـنا يـنسب	*	اخـساره عـنا نفـرحو والناس فنات
يكـفينا لـيتام و انسـى تــتنادب	*	و يكفينا تشـريد يـدزنا مـا فـات
لازمنا نـتـفاهموا و لى تخـــرب	*	ايـولي نـادم كـل واحـد يا سدات
و انــولوا جـمله اصحايب و حبايب	*	يـرجع وطنـي في امحبه و مسرات
ثـم ايكون العيـد و الحـاله تطـرب	*	و يـا ربـي تطفي اعلينا ذا الجمرات
سقم وطنـي يـا لله حــزنو يذهب	*	وحـد صـف أولاد وطني و القادات
و أهديهم للخيـر مـا يبـقى غاضب	*	و يتـبهوا لبـلادهـم يـكفي فرقات
عيب عليـنا عـار ذ الفرقه و السب	*	وطـن الثـوره عـاد للعالم نكتات
مهد الثـوره عــاد للعـالم ملعـب	*	تتـفرج فيـنا العـديه و الكـفرات
يـا وطـني يـحميك ربـي ما تنكب	*	و بـاذن الله اتزول عنك ذا المحنات
تنـجح ذا المصـالحه بـاذن الله رب	*	يـرجع وطني للفرح زهو و بهجات