قصيدة غزلية

                                                       قصيدة غزلية 

قمري طـاير فسما قلـت انسقسيه	*	يعطيني لخبـار يطفـي مشعـالي
طـار اتعلّى فسما ربـي عطـيه	*	ساكن فـي جوف السما ديمه عالي
قتلو يا طير الحما م اجواب اديـه	*	و اقصد بيـه الزايخه زهوت بالي
قلبي واجـي و الغبينه زادت ليـه	*	خففلي بـجـواب عـدّالت حالي
شـور الجلفه ذاجواب اتسقـم بيه	*	للطفله الـلي حبـها شـاو اهبالي
نشتيها و نحبـها قـالت نبغـيـه	*	واسمها مرسوم ديمه  في أخيـالي
حـرف السين امعا الشدّه نبـدا بيه	*	و النـون اللـي بعدها لسم غزالي
حرف الياء لسم الظريفه زيد اعليه	*	حرف الـهاء هو الخـتمه والتالي
يا قمـري تقصيـرها قلبي يشتيه	*	و الجلسه مـن غـيرها ما تحلالي
باقمري حوش السنيه تصـفى ليه	*	تـرجعلي بجــوابها لا تـبطالي
خفف قبل الليـل بجـوابي وديـه	*	واذا طاح الليل يكثـر تهــوالي
يكثر تنـهاتي ايزيد الحـب اعليه	*	يظهر لـي خيـال ذا الريم الغالي
الطفلـه الّلي خيالها قلـبي يشتيه	*	انوصفها بشبيهت الـريم الغـالي
خيـالك يـا زايخه ما ليه اشبيـه	*	مـا شفتش محال مـثلو وابـدالي
زينك صافي و الخلايق حارت فيه	*	و عيونك شبـهو اعيـون الغزالي
فمك خاتم مـن ذهب صافي نزيه	*	وحديثك عسـل النحل سو موغالي
شعرك مثل احرير نسمه لعبت بيه	*	عـدمتي قلبي ولا بـه يبــرالي
عيـن كحلـه ولكحـل ما تحتجيه		قـطست ربي خـالقي ذو الجلالي
وطن الثلج امعا البـرد اسكنت فيه	*	بـرد اجـلفه ما يـوالمش اغزالي
نا حبـّي وطـن الدفاء ليها نشتيه	*	خـايف من بـر البـرود وتقوالي
نتمناها فـي قصـر عساس اعليه	*	ومصّون بصـوار و الحيط العالي
وفراش الزينه قطن و حرير اعليه	*	برد الجـلفه سـم قـاوي قتـالي
وهوا لجلفه في الصمايم يصلح ليه	*	و هواها معـدول زيـن و يحلالي
من برد الجلفه اغزالي خفت أعليه	*	ديمه نخـزر فسما و الأحـوالي
نصخبر عـن بـرها  وشكاين فيه	*	واذا قـالوا صاحيه يـزهى حالي
واذا قـالوا صب الثلج اليوم أعليه	*	نخـلع عنـها لا الزينه تــقوالي
و انعـز اللي جا امن الجلفه نشتيه	*	و انـحبّو و يعـود هـو سـوّالي
جـاني من وطن العزيزه نفرح بيه	*	يعطيـني لخبار و يـريّح بــالي
واذا شفـت اسحاب ظاهر نبهز ليه	*	فـي ظني يلقـى و يسمـع سؤالي
انقلو مطرك صرفو عـزين اخطيه	*	وثلوجك و ريـاحها تخـطي مالي
ابتبروري ورياح عـندك لا تـذيه	*	كون احنين اعلـى العشاق امثالي
واذا صبت اتبعدو ما عـدت اتجيه	*	نحسبلك ذا الخيـر و نقول آصالي
رعدًا دمـدم فسـما بـرق امسميه	*	وتحزم مطرو ظهـر يـا دلاّلي
حيـن انشفتو هكذا شرعنت اعليه	*	عـاتبتو بكلام لابــه يـلقـالي
شـرع الله قتلو اقليبي روح اخطيه	*	خـايف يقدا شـور لـدمي يدوالي
ذا الشـراد إذا دوى واش أيـوحيه	*	وايعييني ما ايعـودش يهـدالـي
خـايف يخلع و الرعد قاسي يذيه	*	فـي ظنو برود صيـاد اغـزالي
يـامن تسمـع ذا الكلام اتمعن فيه	*	واتفسـر لمثال فســر مــقالي
يعـذرني من ضاق للحب و كويه	*	و حرم عنـو نـوم في عز اليالي