قصيدة حب الوطن

                                                       قصيدة  ( حب الوطن ) 2000

يا سايلنــي في اغرامي لاش اتسال	*	خلي جرحي راه دامـــي دخلاني
لا تجرحــــني لا أتكثر لي تسوال	*	بالله عنــك عفنــي كيـما راني
كل آخر عند واحبــيبه عنــها قال	*	وصفـهـا باوصاف فيها و امعاني
و اذكرما عجبو و جلبوا من خصـال	*	تساهــل عنــها انظـم  لوزاني
نا حبي عنها اكتــب كم قـــوال	*	و اتغزل بــها اكــذا مـن فناني
كاين من معــشوقتو عنــها يهبال	*	يذكر لســم ايشيعــو في لوطاني
و كاين من يخــفي الإسم ايديروفال	*	كلــما سمعو ايـــريح متـهاني
و كاين من حبــو أيــوليلو مشعال	*	نعت السم اللي اسكن وسـط اكناني
و نا حبي هــــو الأول فلــمثال	*	و الثـاني للفــال درتـو عنواني
و الثالث مشعالــــها قاوي شعال	*	ثلـث أوصاف الحــب همو نواني
أنفصل عنوانها حتـــى لفـــعال	*	و انــوري عنـوانها للإخـواني
اومن بعد سماها ايجـي في ذا المقال	*	كي تـراه اتلــوم ولي تهــداني
موقعها شمـــال أوروبــا تفصال	*	يفصلــها عنو ابيض موجو بـاني
وسط المغرب ساكنه ريــم التـدلال	*	مهــوش المــروك لسم الحقاني
امن الشمال ايحـدها بحـــرا سيال	*	ومن الشرق امجــاورتها عرباني
هم تــونس وليبــيا لثنـين ابطال	*	من جــاورهم قـال نعم الجيراني
ومن الغرب المروك والصحراء مثال	*	وحتــى مــوريتانيا جـاره ثاني
ومن الجنوب ايحــدها نيجر والمال	*	بعد الــلام الـياء اتسقـم لمعاني
هاذي هي محبــوبتي للــي سوّال	*	نجهــر بــها طول نلقى بلساني
هي عروس افـريقيا تحــفه واجمال	*	يشهد بيـها شعبــها والبــراني
نعت الورده من اغفــل عنها تذبـال	*	يسقيها حــب الـوطن هو ليماني
إذا ننتا تقرا وتعــرف ولــى سال	*	تلقاها وســط الكتــب بالبـياني
اقرا فتـاريخ صفـحات الأبطــال	*	كي تلـقى  الج ـهاد ثــم استناني
الثوره اللــي دوخــت كم جنيرال	*	ما طــاقش يسبــي الريم الفتاني
كم من مره حــاولوا صيـد الغزال	*	قالوا ذا شــراد صيــدو عياني
ما طقنالوا راه ساكــن روس اجبال	*	جبـل الــونشريس واكحيل القاني
وحتى جبل اوراس ما صعــدوا قتال	*	ومن تبــع ذا الـريم موتو حقاني
عرض نفسوا للفنا مـن هـاذي زال	*	وكم من واحـد ما اظهر شي للآني
وكم من واحد صــابتوا فيها لهوال	*	لحموا بيـن أضفار سبع وضرباني
وانا ريمــي مــا اصادوشي نبال	*	قـــرن ايقابل فيه وأكثـر حناني
جند لو قداه مــن دولــه واحـوال	*	ما صادو ما ضاق لحمـوا رهباني
مـن عــام اثلاثين واثمنـيا تكمال	*	بعد الألف انقــال منــوبركاني
شانقـــلو روس اجبال انطال الحال	*	زين النطه في اعـدويه زهــاني
حط اسلاحـــو راه رنــده فلقتال	*	جــراجـيشو قـال بردو  عيناني
زينــت خنــوفه اللي جابت رجال	*	ذيك الي عنـها انـقني باحــزاني
عندي حــق انحبـها والحب اهبال	*	قلبي صيـهد مـا اعشرني واهداني
ياغــالط مـانيش نقصــد فلغزال	*	ذاك الحيــوان سهــم  الرعياني
صـادوه الــرعيان فصحرا جـوال	*	ما هو قصــدي فيـه عنو قيواني
شبّهت المعشــوق بيــها للتـمثال	*	والشــاعر شبــاه للشعر ايقاني
نا حبـــي هيــا ادزايـر يا عقال	*	والصيــاد افـــرانسا بيها عاني
وما طاقتش اصيــادتو بــها لبطال	*	اللي وقفــوا باسلاحهم ضد الجاني
سكنوا في روس  اجـبال انبان الحال	*	ماذلوا محــال مـا حبوا  فانـي
رجــالا ضحـــاو بالنفس وبلمال	*	جابوا لستقـــلال قهروا روماني
يا وطنــي هانوك طرف امن الجهال	*	دارو فتنه فيـك ذوك العـــدياني
اللي فــرق بيـــن لخوه بالتقتال	*	ايجـــازيه الله ربــي رحماني
واللي قـــال الخيـر ويلايم لشمال	*	ايكــافيه الله مــولانه غــاني
قول الخير امليح هو خير الأفعــال	*	اولم الشمل اعليه ربــي وصـاني
والفتــنه هيا أكثــر من لقتــتال	*	ذي آيــه عنــها ابحث فلقرآني
اللي جــاب القــول لكلامو جلجال	*	من مسعد معــروف شاعر وطاني
ابن الحـــاج امباركي هاك التسجال	*	وطواطي في نسبتـو لا تنســاني
معلم عدى احيــاتو لـــلأجيـال	*	نتغــزل حــب دزايــر بقاني
داير بيه حبــها ضــارب خلخال	*	طوقني من كــل جيــهه رشاني
بــإذن الله اتعـــود حالتنا تعدال	*	والحــاله تـزيان واتزول احزاني
يرجــع وطنـي للهنا صعبويسهال	*	ويعــم الســلام في كل اوطاني